Saltar para: Post [1], Pesquisa e Arquivos [2]

Txera-kankan

Txera-kankan

Rasa Sukuru!

 

 

Djes txomou di sis nomi kantu es trou bu nomi,

djes txomou na kantu bu perdi nomi,

Djes kumeu na kantu bu tinha fomi

Bu karapi na karni na kantu sangui kori na kosta bu homi.

 

Djes negou munti bes sen dou splikason, formas i rason.

Djes disejou na kantu es odiou ku fakon na mon, sis spluson na odju era teson.

Djes txomou mudjer di rasa, na kantu es bai buskau na grupu di ses kasta.

Djes txou mudjel preta sima sukuru, na kantu bu ventri negru era di rei di unbundu.

Djes pintaba bu kosta di burmedju, na kantu djatu ta sai na bus labius i medu.

Xikotis ki pinetrou na karni. Gera uns rostu di nobus pretu,

ki vivi mimoria di un rikesa disgrasiadu na meiu di ninhun tiston.

 

Gosi! mesmu ku nega, kel kor di sangui sata xinta na bu bexu karnudus.

Ku korpu kenti di vulkon i kurvas di grasiosa.

Mesmu kenti nhos é kes gentis ki fasi ingana panela pa fidju fika fartu,

Talves, kor di sentus di panela

ta moreba na korpus di kes mujer ki konxi abc di koraju,

di kel rasa ki sai di afrika pa bai gasadja na sensalas.

 

Djes txomou negra, na tenpu ki pé ratxadu ta tapa koba pa sukundi gran di midju.

Mesmu ki na bu stomagu prenha, bu nguli fomi pa da fartura na bu fidju.

Es negou, na kantu es da konta, kal ki é bu rasa, es ranjou un dia oficial pa bu skesedu del, mesmu dentu bu kasa.

Es ri kantu es sabi mé bo ki é kel rasa di preta, ki abri perna pa mulatu sai.

Laguas diskarapi kantu bu nobu rasa nasi livri i negru.

Mesmu asin, es nega dou palmu kantu es odjou ta labanta sen pidi un mo inpistadu.

Mais sobre mim

Subscrever por e-mail

A subscrição é anónima e gera, no máximo, um e-mail por dia.

Arquivo

  1. 2016
  2. J
  3. F
  4. M
  5. A
  6. M
  7. J
  8. J
  9. A
  10. S
  11. O
  12. N
  13. D